يوم..غير عادي

قبل لا ابدا موضوعي بقولكم سبب تاخر دوامي الجامعي الاول وهو ان مبنى السنة التحضيرية توه ينتهي بناء

1..2..3

بداية عام دراسي جديد ..حماس..خوف..فرح..مشاعر مختلطه تتبدل من وقت الى اخر

مبنى السنة التحضيرية الجديد<اهم شي

الهمه ولله الحمد مرتفعة

طبعت الجدول والشعب

جهزت الشنطة

البداية..صباح الخير

بداية يومي الغير عادي وان كانت السنة كلها غير عادية

قمت من النوم الساعه 5:45ص

غسلت وجهي فرشت اسناني وفطرت لبست تجهزت انتضر صديقتي تمرنا عشان نروح مع بعض

وصلت صديقتي لبيتنا الساعه 6:35ص

المحاضرة تبدا الساعه 8:00ص

في السيارة 

جهزنا جداولنا وحددنا اماكن المحاضرات على الخريطة اللي اعطونا اياها الجامعه

سولفنا شوي وسعنا صدورنا لكن المفاجعة اللي كدرت علينا هي الزحمه الغير عادية  بس الحمد لله الهمه الى الان مرتفعه ما وصلنا الجامعه الا  8:30

يعني المحاضرا بدت والمحاضرة من 8 الى 12  

ولقيت مشكله بالشعب عندي وما دخلت قاعتي الا الساعه 10<<اقولكم غير عادي

الغير عادي

الحمد لله ربي ما خيب ظني حماسي ما راح على الفاضي لان اللي صار يخلي اليوم عندي مميز

كنت شايله هم شلون اتعرف وخاصة ان شخصيتي مو مرة اجتماعية وخجولة

لكن للي حصل شيء ثاني قبل لا ادخل القاعه تعرفت على بنتين طيوبات الله يجعلهم من اهل الخير يا رب

قابلت وحده من صديقاتي صار لي 5 سنوات ما شفتها

دخلت القاعه تعرفت على بنتين حبوبات ووسيعات صدر وغير عاديات وحده منهم قالت لي كلمة طيرتني فوووق

قالت لي ما شاء الله عليك جريئة وشخصيتك اجتماعية 

(يمكن لاني اعطيت نفسي ايحاء اني مو خجولة واني بقدر اكون صداقات)

ويمكن بعد لاني نويت اغير خطتي ولا اكون مثل ما كنت بالمدرسة

سبحان الله وانا اللي عند اهلي وبالمدرسة  معروفه بالخجل ووجهي يحمر لاتفه المواقف والاساب

الحمد لله بداية موفقه

في محاضرتي الثانية صار شيء غير عادي

الدكتورة قسمتنا مجموعات وكل مجموعه لها قائدة

الغريب بالسالفه ان البنات اختاروني قائدة يقولون يصلح لي لاني جريئة

وانا اللي عمري ما فكرت اصير قائدة 

الحمد لله تغيير خطتي ومحاولة تطوير ذاتي ..بديت اشوف النتائج بسرعه اسرع مما توقعت

محاضرتي الثالثة كانت حلوة ما فيها شيء يذكر الا البرد اللي كنت احس فيه

طريق العوده

طلعت من الجامعه 4:30 م

واكلت بالسيارة شوي لان الجوع قطع بطني من اول ما وصلت الجامعه ما اكلت شيء

والغير عادي اني وصلت البيت على اذان المغرب

يومي الغير عادي شارف على الانتهاء

يمكن البعض يحس ان موضوعي ما فيه فايده

بس حلو لو اكتب عن هذا اليوم بمدونتي العزيزة

شكرا لانكم اعطيتوني جزء من وقتكم

 

الموضوع كتبته بتاريخ..

17/10/2009